24‏/11‏/2011

عندي أمل ...


لما تردّي حبي ليكي
والاقي من غيري
اتقبَل
تنزل عليكي دمعتيني
مليانين
حب وزعل
وانا بابي عن توبتك يا أحلى مصر
عمره ما اتقفل
ببكي واقول
شايف أمل

لما بلاقي المعجزات خلصِت ..
ويقسِمنا الجدل
واما بشوف المعتوهين
يِفتوا بجهل
يجيب شلل
ولاّ محاكمَة
دلّعت في الفاسِدين
شِعر وغزل
بهمس واقول
عندي أمل

واما ناديتي من الميدان
نفّضت قلبي من الكسل
ونزلت أستقبل شروقك
باشتياق
غير مُحتمَل
فتبوسني طلقات الرصاص ..
و الْعَن في خوفي
اللي اتقتل !
واهتف واقول
عندي أمل

أوقات بحس
انك جنيتي اليأس من شجر الأمل
وساعات بشوف المرّ فيكي
وانتي
أحلى من العسل
وأنا هعمل ايه يا مصر فيكي
وكل شئ عندي
اتعمل
هصرُخ واقول
عندي أمل

وبرغم طيبتك
اللي خلّت شعب من حُبه
ارتجَل
وبرغم بُطء العدل
بعدِل
في اللي عمره ما اتعدل
وبرغم إرهاب الفلول
وبرغم موقعة الجمل
بضحك واقول
عندي أمل

 _______________

عدنان أحمد
2/10/2011

هناك 7 تعليقات:

مدفع رمضان يقول...

عندي أمل ... :)

كنت ملاك يقول...

جميله جداااا

عدنان أحمد يقول...

مدفع رمضان ،، كنت ملاك

شكرا لمروركما الجميل

Unknown يقول...

اغيب مهما
اغيب وارجع
اجد كلامك كما
هو:الجمال كله

عدنان أحمد يقول...

ومهما تغيبي يا دكتورة برضو مرورك ليه نفس الروعة والإشراق

abhasoft يقول...

مشكووور

Asmaa Abd El-azez يقول...

وهمية كالعادة
بجد انا ببقي مصدومة كده وأنا بقرأ ماشاء الله :)